ՀՀ Շիրակի մարզի «Գյումրու թիվ 18 միջնակարգ դպրոց» ՊՈԱԿ-ի ՄԱՍԻՆ

Դպրոցը հիմնադրվել է 1948 թվականին՝ Նորավան թաղամասում, հայրենիք ներգաղթած հայրենադարձների երեխաների կրթությունը կազմակերպելու նպատակով։ 1988 թվականի Սպիտակի աղետալի երկրաշարժից հետո կառուցվել է դպրոցի նոր մասնաշենքը, որտեղ ուսումնական գործընթացը տեղափոխվել է 2000 թվականին։

Գյումրու թիվ 18 միջնակարգ դպրոցի տնօրինությունն ու ողջ աշխատակազմը լիովին գիտակցում են իրենց կարևոր դերակատարությունը մեր երկրի ապագայի կերտման գործում։ Դպրոցում ապահովվում է բարձրորակ կրթություն, ինչպես նաև կազմակերպվում են բազմաբնույթ միջոցառումներ, որոնք նպաստում են աշակերտների գեղագիտական, ռազմահայրենասիրական և քրիստոնեական դաստիարակությանը։

Դպրոցի շրջանավարտներն այսօր աշխատում են գիտության և կրթության ոլորտներում, աչքի են ընկնում սպորտում, ծառայում են Հայոց բանակում, ինչպես նաև հաջողություններ են գրանցում տարբեր արհեստների մեջ։ Նրանք մշտապես հպարտանում են իրենց դպրոցով, ստացած կրթությամբ և առանձնանում են հայեցի ու քրիստոնեական դաստիարակությամբ։

Դպրոցն ունեցել է աշակերտներ, որոնք մասնակցել են միջազգային կոնֆերանսների, այդ թվում՝ Լուսինե Կարլովիչը և Համբարձում Մաթևոսյանը, ով ներկայումս Արմավիրի մարզպետն է։ Աշակերտները մասնակցել են նաև ամերիկյան FLEX ծրագրին՝ հաղթելով և ուսումը շարունակելով ԱՄՆ-ում։ Հանրապետական օլիմպիադաներում դպրոցը գրանցել է բարձր արդյունքներ՝ արժանանալով II կարգի դիպլոմների և գովասանագրերի։

Դպրոցի անգլերեն լեզվի բազմավաստակ ուսուցչուհի Լիդա Խաչատրյանը մասնակցել է բազմաթիվ միջազգային կոնֆերանսների և սեմինարների։ 2002–2004 թվականներին նա մասնակցել է TEA ծրագրին, որի շրջանակում դպրոցը ձեռք է բերել համակարգիչներ, տպիչ և պատճենահանման սարքեր, ինչպես նաև գրականություն։

2012 թվականին 9–10-րդ դասարանների աշակերտները մասնակցել են Բրիտանական խորհրդի կողմից կազմակերպված «Օլիմպիական գանձերի որոնում» մրցույթին և զբաղեցրել երկրորդ տեղը։

Դպրոցը ակտիվորեն մասնակցում է երգի և պարի մրցույթ-փառատոնների, ասմունքի մրցույթների («Այբ» կրթական հիմնադրամ), ինչպես նաև առարկայական մրցույթների՝ «Կենգուրու» (մաթեմատիկա), «Մեղու» (մայրենի), «Ռուսական արջուկ» (ռուսերեն)։ Աշակերտները ներգրավված են նաև երիտասարդական նվաճումների ծրագրերում և բազմիցս արժանացել են պարգևների։

Դպրոցը իր ավելի քան 70 տարվա գործունեության ընթացքում ունեցել է բազմաթիվ ձեռքբերումներ։ Ժամանակը անցնում է, բայց դպրոցը շարունակում է կանգուն մնալ՝ իր սաներով, սերունդներով և գիտության ու մշակույթի ոլորտներում թողած անջնջելի հետքով։

2026 թվականի հունվարից ՀՀ Շիրակի մարզի «Գյումրու թիվ 18 միջնակարգ դպրոց» ՊՈԱԿ-ում գործում է նաև նախակրթարան՝ նախատեսված 5 տարեկան երեխաների համար։